top of page

Jo的信





致勇敢的你:


近年有朋友覺得你變咗、開心咗。我覺得你比以前樂觀、有自信、無再對家人亂發脾氣、會聆聽其他人意見、變得更加積極、自律。我知道你係經歷過無數次掙扎,先有今日嘅韌性。


2020年某月,你嘅心理狀況變得嚴重,有時會無端端喊,覺得好痛苦。除咗返工,其他時間乜都唔想做,用食物去填滿無盡嘅空虛。你擔心會變得更差,好快搵到社工同臨床心理學家(Clinical psychologist, CP)幫助,面對一整年嚟令人不解嘅憂鬱、悲憤。經過幾次心理治療,一段段創傷經歷重現,埋藏心底嘅感覺終於得到釋放,令創傷記憶同情感重新連結。原來種種都係「創傷後壓力症」嘅徵狀。


你逐漸理解到自己嘅情緒同身心反應,揾到合適嘅應對方法。莫名嘅暴燥、憂鬱同暴食愈嚟愈少出現,但有出現更多嘅焦慮、回憶閃現、對聲音敏感等等狀況。你決定放個長假休養身心,毅然裸辭,去探索新方向。


假期中有兩個非常感動嘅時刻:

  • 某日突然可以專注睇完一篇新聞、睇小説。係我失去咗多個月嘅閲讀能力啊!

  • 一個人到山上攀岩,訓喺抱石墊上,聽著雀仔聲,望著藍天,陽光穿過樹葉間嘅空隙,突然覺得活著有多好。


你繼續接受治療,各種徵狀慢慢消逝,只剩底「驚恐發作」——第一次發生係喺2020年4月,户外運動攀登(Sport Climbing)嘅墜落令你異常驚恐,難以專注攀爬,情況更持續發生。當最鍾意嘅事變成最大嘅恐懼,真係好難受。接受現實嘅時間好漫長,充滿懷疑同掙扎。你明白到一切都係過程,決意砍掉重煉。你學識左點樣安頓身心,學識好好同人溝通。而家已經做到主動去練習墜落、嘗試領攀!雖然我唔保證驚恐發作已消失,但你已經有信心去面對,朋友亦會陪伴你。你亦因為由運動攀登轉移重心到抱石(Bouldering),喺户外抱石方面變得好有經驗,得到另一種歡樂。


我相信每個人都擁有獨特嘅內在力量,總會揾到自己條路。世界充滿苦難、壓迫,你要記得照顧好身心,讀多啲書,飲多啲水,盡力發聲,就好似一年前你透過香港心聆勇敢講出你嘅故事。我好感激CP、朋友、家人、喺香港心聆遇見嘅每一位,係佢哋令你條路易行好多。


送你一段歌詞:

「長夜裡看守甚麼

憑甚麼你怯慌 為明日沮喪

仍然有願望


乘著那風

沿路感覺

何其遼闊 空曠

流淚的過雲雨 或遙望清朗

讓一切沒定案」

Comments


bottom of page